Sorgune & Galeria
ARTgia sormen- eta erakusketa-gunea da. Etengabeko eraikuntzan, gardena, malgua, non dena gerta daitekeen. ARTGiaren helburua da sortzeko baldintzak bultzatzea. Toki katalizatzaile bat izatea, trukeak, elkarrizketak eta esperimentazioa eragiteko, sormena oinarri eta sorkuntza garaikidea xede. Proposamen artistikoen hibridazioa aktiboki sustatzeko gunea, norbanakoen proposamenena, baina baita kolektiboena ere, hainbat arlotatik.
Ekoizpen artistikorako ez ezik, gizartearen eta herritarren ekoizpenerako ere. Sorkuntza artistiko eta kultura- kudeaketarako proiektua da, baina baita plataforma bat ere, topagune eta erakustoki. Horretarako, sorkuntza artistikoa kudeatzeko eta antolatzeko bestelako ereduak ikertzeko apustua egiten du, estrategia berritzaileen alde eginda, parte-hartzea sustatzeko bideak bultzatzeko, sorkuntzaren, arte- erabiltzaileen eta jendartearen arteko harresi -orain arte- zeharkagaitza hautsiko duten bideak.
Hau da, lankidetzan ardazturiko filosofia oinarri, bere baliabideak osatzen ditu ibilbide eta jatorri desberdinetako sortzaileen arteko truke-faseekin eta, hala, sortzeko, antolatzeko eta jendartearen eta ekintza artistikoaren arteko harremanetarako bestelako formulak bilatzen ditu. Truke, hibridazio eta elkarrizketa artistikorako tokia, artistentzat, sortzaileentzat, kultur eragileentzat eta oro har jendartearentzat, erdigunean sormena, ikerketa, esperimentazioa, berrikuntza eta hedapen artistikoa jarrita.
“ARTgia den… mira hadi”
Gune bizia
ARTgia gune bizia da, eta, ondorioz, moldakorra: ingurunera, auzora eta prozesu artistikoetan eta denboran
aldakorretan sortzen diren beharretara. Hirigunearen ertzetatik at jaiotako gunea, eta jaiotza hori aldarrikatzen duena, artea eta kultura auzoetara ere eramateko. Hori guztia apustu eginda, gainera, euskara izan dadin komunikazio-hizkuntza, hau da, osagai aktiboa artetik eta Gasteiztik euskarazko sorkuntza plastiko eta bisuala -modu aktiboan- sustatzeko eginkizunean.
ARTgiaren instalazioetan, denetik egingo da: bilerak, jardunaldiak, aurkezpenak, grabaketak, proiekzioak, proiektuen garapena eta hainbat sektore sozialen arteko elkarrizketa, bai eta hainbat diziplinatara bideratutako jardunbide artistikoak ere. Hala, ziklo sortzailearen ia fase guztiak aseko ditu: sorkuntzatik zabalkundera, prestakuntza tarteko, lan prozesuak ere erakutsita.
Emakumea eta gazteria
ARTgia proiektuaren zuzendaria Irantzu Lekue euskal artista da, eta talde motor baten laguntzarekin beteko du eginkizun hori. Emakumea eta gazteria sorkuntza eta berrikuntzara bideratutako gune batek batuta. Gune irekia sorkuntzak, ekimenak, jarduerak, proposamenak, kolaborazioak, ezagutzen eta esperientzien trukea… garatzeko, eredu misto honi esker sortuak: ekimen pribatutik jaioa, baina irekia.
Hala, ARTgiaren instalazioetan, sorkuntza fasean dauden proiektuak hartuko dira, eta laguntza-zerbitzua eskainiko du ibilbide profesionalen garapenerako, hala nola hasierako prestakuntza-zerbitzu etengabeak, proiektuen zabalkundea barne. Horrenbestez, ARTgia jaio da aukerak irekitzeko nahiarekin, sortzaile gazteenek ere izan dezaten aukera lehen urratsak beren gaitasunen garapenerantz eta osteko profesionalizaziorantz egiteko.
Kulturaren arnasgunea
ARTgia oinez jaio da. Hiriaren, Gasteizen, behar bati erantzunez jaio da. Artea erakusteko tokien beharra, sormenera irekitako lekuena, kulturaren sektorean hibridaziora, elkarlanera eta berrikuntzara irekitako eremuena.
Horrexegatik, ateak ofizialki ireki baino lehen ere, dagoeneko egin dira bertan hainbat bilera, aurkezpen bat eta erakusketa bat artisten eta sortzaileen artean; kultur sorkuntza sustatzeko hainbat ekimen eta jarduera. ARTgia jaio da sustatzeko, bultzatzeko, artearekin eta kulturarekin lotutako tokien biderketa.
Azken jarduerak